حكمة السيد الرئيس

تعليق على مقال حمدى رزق (أوباما فى القاهرة ) باليوم السابع

حكمة السيد الرئيس
بواسطة: هووبة
بتاريخ: الخميس، 14 مايو 2009 - 06:49
السيد حمدي رزق ( متخصص الهجوم على الإخوان و رئيس تحرير مجلة قومية هابطة التوزيع ) يعنى هيكتب ايه غير عن حكمة الرئيس اللي عينه وولى نعمته و علاقاته و دوره ... يا راجل حرام عليك .. اتقى الله .. دا أنت ساعات بتكتب كويس بقى يا راجل تقول ان ( القاهرة كبيرة بدورها الذي تؤديه في الشرق الأوسط وفى العالم، القاهرة كبيرة بثقلها وثقل الرئيس مبارك ( هو كام كيلو صحيح ؟؟ ) وحكمته وعلاقاته الدولية ).

طب والنبي يبقى سلملى على الدور و العلاقات و الحكمة بتاعت ريسنا الثمانينى العمر ( اى جاوز الثمانين من العمر .. اى بلغ من العمر أرزله و لم يتعظ ) اللي خلت الشباب يطفش من البلد و يموت في البحر .
و اللي خلت شوية اللصوص يسرطنوا البلد بالقمح المسرطن مرة و الفاسد مرة تانى و المبيدات و الأغذية و اللحوم و ..و ..
والنبي فين حكمة السيد الرئيس لما مصر اخدت على قفاها في صفر المونديال و لا فين الحكمة دي لما منعنا الطعام و الدواء عن إخواننا الفلسطينن في غزة و قفلنا المعبر .

وبالمر يبقى قولى عملنا ايه بحكمة السيد الرئيس دى و علاقاته و ملايين الشباب مش لاقيه شغل دى الزبالين يا راجل ( بتوع الخنازير ) مسلموش من حكمة السيد الرئيس و إصابتهم اللعنة ( قصدى الحكمة ) و بقوا عاطلين عن العمل .

هي حكمت الرئيس دى ايه بالظبط ؟ عايزين يعنى نعرف حكايتها أصله الشعب و النبي لسه غلبان و مبيفهمش ( زى ما قال نظيف بيه سابقاً ) عايزين نعرف الحكمة دى اللي بيتغنى بيها السيد عبد الله كمال و السيد حمدي رزق ليل نهار و كتبة السكك الباقية من رؤساء تحرير الصحف القومية و بعض الصحف الخاصة أمثال السيد بكرى الصعيدي ( قصدى اللي عامل نفسه صعيدي ) .

بقى اوباما جه مصر عشان حكمة الرئيس و الله اضحكتنى على حال يبكى .
بالله عليك يا عم رزق مش مكسوف و أنت بتبجح كدا عيني عينك و تقول حكمة الرئيس بالله عليك أنت و بتكتب الكلام دا مش بتفتكر حال مصر ( المنحوسة ) حاليا منذ أن قادها السيد الرئيس ( أبو حكمة جنان )
* تحب أكلمك عن حكمة السيد الرئيس في الصحة وما أصابها من انتشار فيرس سي و السرطانات و الفشل الكلوى و أنفلونزا الطيور و ..و..

* و لا أكلمك عن التعليم و الجامعات المصرية اليتيمة اللي مبتدخلش أصلا قائمة أفضل 500 جامعة على العالم و لا عن تدنى البحث العلمي و تخلف مناهج التعليم و التقويم و لا .. و لا ..

* ولا تحب أكلمك عن الديمقراطية و حقوق الإنسان واهو ملف حافل بصراحة بالحكمة بداية من تلفيق قضية ايمن نور و مروراً بالمحاكمات العسكرية للإخوان و الملاحقة الأمنية المستمرة لأعضاء الإخوان و انتهاءً بسحل و ضرب المتظاهرين و المعارضين من حركات المجتمع المدني ( و الذي لم يسلم من السحل حتى القضاة ) .

* ولا أقولك الإسكان أحسن واهو نتكلم عن مشروع ابني بيتك و لا إسكان مبارك للشباب اللي كل شوية شغالين في محافظة اخدوه ووزعوه على الحبايب و القرايب و ياعينى قال ايه يجى الريس ( الحنون صاحب الحكمة الجنان ) يسلم خمس ست عقود شقق لشوية ناس غلابة .( و لو دورنا وراهم هنلاقيهم مخبرين امن دولة زى بتوع اعلانات الحملة الرئاسية ) .

* طب بص يا عمنا صلى عا النبي كدا و نتكلم أفضل حاجة عن الفن و المواصلات و متسألنيش ايه العلاقة لان اهو كله بيتحرق مهو مسرح بنى سويف أتحرق و قطار الصعيد أتحرق و مجلس الشورى أتحرق و كله بيتحرق و بيولع الا ال ....؟

يلا معلش بقى يا أبو رزق جات فيك أنت أصلى أنا مغلول من اللي بيحصل في البلد من نظام مبارك و حزبه ( الحزن الوطني بالنون ها ) و تيجى أنت تقولي حكمة السيد الرئيس
و النبى متنساش تسلملى عليها .
يا ريت الموقع ينشر التعليق كاملاً

رابط المقال و التعليق :

http://www.youm7.com/News.asp?NewsID=98908