مشهد مر فى حياتى

( بفتح الميم او ضمها متفرقش )
الحاج محمد حسين ( ابو العروسة ) جالس على كنبه بالصالة و يمسك بيده ريموت الدش يقلب فى القنوات دون ان يستقر على قناة ، و بجواره موبايل متوسط القيمة و الجودة .
الأثاث الواضح في المنزل بسيط و متواضع كما ان التليفزيون مقاس عشرين بوصة .
يرن جرس الهاتف المحمول الخاص بالحاج محمد حسين ... يخرجه و يرد
- الحاج : الو .. سلامو عليكم
- المتصل : و عليكم السلام ..ازيك يا عم الحاج ؟
- الحاج : الحمد لله .
- المتصل : معاك ايهاب يا عم الحاج بتاع ???
- الحاج : أهلا يابنى ...ازيك أنت عامل ايه ؟
- المتصل : الحمد لله .. يا عم الحاج في البيت بلغوني إن حضرتكم رديتو علينا و قلتو كل شيء نصيب .. يعنى رفضتو الموضوع .
- الحاج : يابنى كل شيء نصيب .
- المتصل : صحيح كل شيء نصيب طبعا .. بس انا كان ليا عشم يا عم الحاج تعتبرني زى ابنك عبدالله و تقولي ايه السبب ؟
- الحاج : يابنى كل شيء نصيب .
- المتصل : طب صلى عا النبي كدا يا عم الحاج .
- الحاج : عليه الصلاة و السلام .
- المتصل : يا عم الحاج أكيد حضرتك سألت عليا و عرفت أنا مين و من عيلة مين ..و حضرتك مش شكرانية في نفسي بس أنا و الحمد لله و عيلتى بنتمتع بالسيرة الطيبة و ناس محترمين جداً بين الناس ... و معتقدش إن دا سبب رفض حضرتك ليا ..
- الحاج : يابنى ..
- المتصل : معلش يا عم الحاج اسمعني ..خليني أكمل ..يا عم الحاج و لو حضرتك كنت خايف لبنتك تتبهدل معايا في مصر ولا ف??? فحضرتك أكيد عارف أنى معايا اخوات بنات و اللى مرضهوش لاخواتى مش هرضاه طبعا لبنات الناس دا غير أنى صعيدي يا عم الحاج يعرف في الأصول كويس .. ومش هاخد بنات الناس عشان أبهدلها .... لانى الحمد لله ظروفي كويسه و بكسب كويس من شغلي و الحمد لله .....
والله يا عم الحاج أنا شاريكم و شاري بنتكم لأبعد حد والله يا عم الحاج أنا من سعت ما دخلت بيت حضرتك و حسيت أن فاطمة هي نصيبي .......
و بعدين يا عم الحاج لو حضرتك خايف من موضوع الشقة اللى ف مصر و انى مش هقدر أجيبها فلك الحق تاخد الضمانات اللى تريحك.... و انا بقول لحضرت قبل مكنا نكتب الكتاب ان شاء الله أبعت انا لحضرت و يجى عبدالله هنا القاهرة يمضى بنفسه عقد الشقة و لو عايزه باسم الأستاذة تحت امرك يا عم الحاج .

يا عم الحاج أنا شاريكم و هعمل اللي توافقو عليه ... ووالله يا عم الحاج بنتكم فى عنيا من جوه و هحافظ عليها اكتر من نفسي ...
ثم ان يا عم الحاج لو موضوع الشغل ؟؟؟؟ دا مقلق حضرتك او الشغل اللي مش ثابت عموما ففين يا عم الحاج فى الصحافة و الإعلام الشغل الثابت ...حضرتك لو سالت هتعرف ان كل الصحفيين بيتنقلو من جريدة لجريدة و من موقع نت لموقع تانى ,و هو شغلنا كدا يا عم الحاج ....مفيش مكان نثبت فيه الا الصحف القومية بتاعت الحكومة و دي عايزة واسطة كبيرة مش معايا حاليا .
و لو الشغل مش عاجبك مستعد حضرتك ان اسبب الشغل و اروح شغل تانى لو دا يريح حضرتك و يطمنك بالرغم من انى مرتاح فى الشغل دا بس يا عم الحاج مش مشكلة المهم حضرتك تطمن . .. تمام يا عمى الحاج ..حضرتك سامعنى ؟؟
- الحاج : ايوه يابنى .
- المتصل : طب يا عمى الحاج انا هدى لحضرتك فرصة اسبوع لو حضرتك تتكرم و تفكر فى الموضوع تانى و اتصل بحضرتك بعد أسبوع اعرف ردك النهائي و يا عم الحاج انا تحت أمرك فى اى ضمانات حضرتك عايزها على صحة كلامي و صدقه .
- الحاج : يابنى مش عارف أقولك ايه ؟..يابنى مش مشكلة ضمانات و لا حاجة ...يابنى كل شىء نصيب و ربنا يكرمك باللي أحسن منها و مننا .
- المتصل : يا عم الحاج والله أنا حاسس أنها نصيبي ..حضرتك بس فكر و انا هتصل بحضرتك بعد أسبوع إن شاء الله ... و أنا أسف لو كنت أزعجت حضرت بس والله يا عم الحاج انا عملت كدا لانى شاريكم و نفسي ارتبط بيكم .
-الحاج : يابنى ما تتأسف على الصح ..انت عملت الصح و دخلت البيت من بابه و انا عموما هتشير العروسة و امها تانى و اللى فيه الخير يقدمه ربنا .
- المتصل : ان شاء الله خير